تابع تجهيزات رمضان 🌙🌙🌙
ملف لتجهيز الخضروات
الملــوخية
بعد ما تخرطيها تكوني محضرة مرقة فراخ او لحمة او اي نوع المهم مرقة وتكون باردة شوية تاخدي بمعلقة الغرف مرقة وتسكبي على الملوخية اللي طبعا مجهزاها فطبق عميق شوية وتقلبي الملوخية مع المرقة كويس جدا وتكون متماسكة القوام يعني تحطي المرقة بشويش وبحذر بتوضيح اكتر تكوني كإنك بتبليها بالمرقة وتحطيها فاكياس على قد الوجبة اللي متعودة تستخدميها وتحطيها في الفريزر ولما تحبي تستخدميها تعملي المرق بتاعتك عادي وتحطي الملوخية عليها وبعدها التقلية وبالهنا
البامية
بعد غسلها وتنشيفها تقمعيها وتاخدي حلة تضعي فيها مية وتخليها تغلي وتضعي فوق الحلة مصفى وتحطي فيها البامية وتغطيها لمدة 10دقايق واحيانا بخليها ربع ساعة وبعدين ننزلها من المصفى فحاجة واسعة شوية عشان تبرد كويس ثم تحطيها فأكياس على قد وجبتك طبعا وتحطيها في الفريزر وانا بقولك (على قد وجبتك )لأن ما ينفعش نطلع الحاجة من الفريزر وبعدين ندخلها تاني لأنها ممكن تبوز او تفقد قيمتها الغذائية.
كذلك نفس الطريقة مع البسلة والفاصوليا الخضراء المهم في اتباع الطرق دي هي نظافة الخضار كويس جدا وعدم طهيها فترة طويلة على البخار لازم نعرضها للبخار فقط 10دقائق عشان ما تفقدش قيمتها الغذائية لما تيجي تخرجيها من الفريزر وتطبخيها.انا شخصيا بأعمل الطرق دي فكل مواسم الخضار ومضمونة جدا وطعم الخضار المطبوخة كأنها طازجة وبالهنا والشفا
القلقاس .. هتجيبي القلقاسه ويبقى جنبك فوطه نظيفه ومبلوله على خفيف
وقشري القلقاس وامسحيه بالفوطه ويفضل تكوني ماسكه القلقاس بفوطه تانيه نناشفه وانتي بتقشري علشان يبقى سهل تحكمي فيه
امسحيه بالفوطه المبلوله كويس بدون ما تغسليه ولا حاجه لانه بينزل فايدته لما يتغسل ..
قطعيه مكعبات وعبيه في اكياس وعلى الفريزر
البطاطس
هتجيبى كمية كبيييييييييييييييرة وتقشريها وهتقطعيها 4 انواع
- صوابع
-شيبسى رقيقة
-تخينة لصنية البطاطس
مكعبات للبطاطس النى×نى
وهتحطى حلة ميه تسخن وعليها معلقة ملح فقط هتنزلى البطاطس كل نوع لوحده طبعا 10 ثوانى يا دوب غلوة وطلعى وصفى ولما يبرد فى الاكياس وعلى الفريزر
البذنجان والفلفل والكوسة بقى هتأورى وتغسليه وتنشفيه بفوطة المطبخ النظيفة وتحطيه فى كيس وتربطيه وعلى درج التلاجة وتستخدميه خلال اول اسبوع رمضان ولا هيحصلوا حاجة
ايه هيسود طب ما يسود هو هيهددنا ولا ايه ما بنتهددش ما انتى هتسويه ولونه هيتغير وياخد من لون الصلصة
البروكلي : يقسم الي اجزاء ، و يوضع في مصفاة و توضع المصفاة فوق وعاء به ماء مغلي ، و يدوب اللون يتغير يرفع و يترك ليبرد ثم يعبأ .
اهم من كل ده خزني الخصرة علشان في الحر بتكون غاليةوفاضية جبيها وقطعيها واغسليها كويس ونشفيها خالص من المية وحطيها في اكياس واكتبي عليها علشان متتلخبطيش بين الكسبرةوالبقدونس
تخديعة_المحشي.. هاتي 3كيلو طماطم مع كيلو بصل واضربيهم في الخلاط.. وحطيهم على النار يتصلصلوا.. واول ما يتصلصلوا انزلي عليهم ببرطمان صلصه.. حطي بهاراتك وملحك وفلفل وسمنك وزيتك بكمية تكفي حجم الطماطم.. وسيبيها تبرد.. قطعي عليها الخضرة زي ما تحبي.. مع الزعتر والنعناع .. وشيلها في اكياس في الفريزر..
حمري بصلاية في شوية زيت مع توماية وتطلعي الكيس من دول على شووية رز مغسول .. بقى عندك خلطة محشي والبصل هيخليها فريش..
البقولياااااااااااااااااااااااااااااات
الفاصوليا واللوبيا والحمص هتسلقيهم سالقة الا ربع
علشان الربع الاخير هياخدوا وهو فى الصلصة علشان ياخد من طعمها و علشان ما يبوش
بس وانتى بتسلقيه لازم تغطى وتوطى النار علشان القشرة ما تطلعش منه
اعملي صلصة جاهزة.. هاتي الطماطم واديها سلقه علي النار بحالتها كده ومعاها واخدة بنجر واضربيها في الخلاط وحطيها على النار مع شوية زيت وملح وسكر عشان نعادل حموضتها لحد ما تصلصل. سيبها لما تهدا وشيليها في اكياس تلاجها املي نص الكيس وبططيه وشيليها في الفريرز بحيث تكون عامله زي الملوخيه المجمده ، بتبقى سهله في كسرها وتحطي على الاكل على قد ما تحتاجي..
اعملي دريسنج السلاطة.. هاتي ازاة بيبسي بلاستيك صغيره.. حطي فيها معلقة ملح ومعلقة كمون وربع فلفل اسود ونص معلقة زعتر ونص كسبره وامليها تلات اربعها خل والباقي زيت وشيليها في التلاجه.. وكل ما تعملي سلاطه ولا تقطعي طماطمايه رجي الازازه دي ورشي منها رشه على السلاطة.. يا سلام لو زيت زيتون.. ويا سلام لو تحطي فص توم مفدوغ..
هاتي برطمان صغير كده وهتعمليه فيه تتبيلة البذنجان المخلل (الثوم المهروس والملح والشطة والخل والليمون والفلفل المفروم) وهتحطى على وش البرطمان بعد ما يتملى شوية زيت اكل او زيت زيتون وتقفلى البرطمان كويس وكل مرة تاخدى منه بمعلقة نظيفة مش المعلقة اللى بتطبخى او بتقلبى بيها علشان ما يعفنش
وهتعملى برطمان تانى توم فقط مهروس وعلى وشه زيت وده لاى استخدام وتقليات
يارب ماكنش نسيت حاجه ورمضان كريم 😍😍😍
