مربى الجزر.
سهلة وبسيطة أوي.. تعالو نقول طريقتها في خطوتين..
هانحتاج كيلو إلا ربع جزر.. كبايتين سكر.. عصير 2 لمونة.. بشر لمونة.
هانغسل الجزر ونقشره وناخد جزء صغير من الجزر ونبشر مقدار نص كباية.. ونسيبه على جنب.
ودلوقت نقطع الجزر دواير ونحطه في حله عالنار وعليه ميّه يادوبك تغطيه ونسيبه على نار هادية لحد مايبقى طري.. نصفيها من الميّه الزيادة؟؟و نضربها بال hand blender يبقى بيوريه ونزود عليه الجزر المبشور والسكر ونقلبه عالنار لحد مالسكر يدوب.. نقلب معاه اللمون وبشر اللمون ونقفل النار ونسيبه يهدى وبعدها نحط المربى في برطمانات معقمة.
جربوها حلوة وطعمها مختلف.