مولتن كيك
او ساعات بيسموهاشوكلت فوندو كيك
او molten lava cake
بيشبهوها بالبركان لان اول ما الكيك تتفتح تنزل منها الشيكولاته السايحه
بجد طعمها رااااائع وسهله جدا
ممكن لو جايلك ضيوف تكون في خلال ربع ساعه عملتيها
وممكن تجهزيها وتسيبيها علي جنب ووقت ما تحبي تاكليها تسويها لانها بتتاكل دافيه
وفي الكافيهات بتتقدم دافيه وجنبها بوله ايس كريم فانيليا بتبقي خطيره
المقادير تكفي فردين
٢ معلقه كبيره دقيق
ربع معلقه صغيره بيكنج بودر
٢ بيضه صغيره
فانيليا معلقه صغيره خل
٤ معالق كبيره سكر ( ٦٠ جرام)
٣ معالق كبيره زبده(٦٠ جرام)
٢ مكعب شيكولاته خام (٦٠ جرام)
احسن نوع شيكولاته خام اسمها سويفاكس وواضحه في الصور
الطريقه
هنبشر الشيكولاته ونحطها مع الزبده تسيح علي حمام مائي ساخن ونشيلهم ونسيبهم يهدوا شويه
البيضتين مع الفانيليا مع الخل نضربهم بمضرب البيض كويس
ونضيف عليهم السكر شويه بشويه مع استمرار الضرب حوالي ٥ دقايق علي الاقل لحد ما تبقي زي الكريمه وتفتح وتعلي
نضيف عليهم الدقيق المنخول والبيكنج بودر ونقلب بمعلقه بالراحه من تحت لفوق عشان الهواء مش يخرج منها
نصب الشيكولاته والزبده السايحين ونقلب بالراحه
هنجيب قالبين من قوالب الكريم كراميل او اي طواجن صغيره بتدخل الفرن
ندهنها زبده ونبطنها كويس جدا بالدقيق
ندخلهم الفرن علي ١٨٠ درجه لمده ١٠ او ١٥ دقيقه بس
الكيك دا نسبه الدقيق قليل جدا فهيمسك من الجوانب بس من النص هيفضل سايح فمش هنسيبه في الفرن اطول من كده
لما يطلع من الفرن نسيبه ٥ دقايق ونقلبه بالراحه ونقدم معاه ايس كريم فانيليا والكيك يكون سخن او دافي
